Um félagið

Íslenska vitafélagið – félag um íslenska strandmenningu
Íslenska vitafélagið var stofnað árið 2003 sem frjáls félagasamtök og telur nú um tæplega 200 félaga. Meginmarkmið félagsins er að efla vitund Íslendinga um þau miklu menningarverðmæti sem liggja í og við strendur landsins. Strandmenning er nýyrði sem Vitafélagið hefur kynnt og lagt áherslu á í allri sinni starfsemi.
Í lögum félagsins eru markmið þess skilgreind þannig:

• auka áhuga og þekkingu á vitum og öðrum strandminjum.
• vinna að söfnun, skráningu og miðlun upplýsinga um vita og strandminjar.
• stuðla að verndun vita og strandminja sem mikilvægum hluta af menningararfi þjóðarinnar.
• stuðla að fjölbreytilegri notkun vitans og annarra strandminja sem samrýmist verndun og sögu viðkomandi staðar.
• koma á samvinnu við minjasöfn og aðrar opinberar stofnanir.
• koma á samvinnu við erlend strandmenningarfélög, vitafélög og stofnanir með sambærileg markmið.

Markmið félagsins er einnig að stuðla að viðhaldi handverks og annarrar þekkingar á sviði strandmenningar með verndun og nýtingu hennar að leiðarljósi.
Til að ná þessum markmiðum hefur félagið staðið fyrir ráðstefnum , fræðslufundum, menningarviðburðum og uppákomum víðsvegar um land og tekið þátt í norrænum ráðstefnum, hátíðum og fundum. Félagsmenn hafa einnig aðstoðað landsmenn við margskonar verkefni og oft virkað sem brunnur tengslanets. Félagið hefur haft vakandi auga með ýmsu sem betur má fara í stjórnsýslunni og sent tillögur til opinberra aðila með áskorun um viðbrögð.

Verndum strandmenninguna með nýtingu og nýsköpun.