Silfur hafsins og síldin á Sigló


Síðasta fræðslukvöld vetrarins í fyrirlestraröðinni sem Íslenska vitafélagið hefur staðið fyrir í vetur í samvinnu við Sjóminjasafn Reykjavíkur – Víkinni var miðvikudagskvöldið 25. apríl. Yfirskrift þessa fróðleiksmola var Spegill fortíðar – silfur framtíðar. Síðasta miðvikudag hvers mánaðar frá því í október hafa gestir og gangandi getað gengið að því vísu að tveir fyrirlesarar væru á staðnum og heitt kaffi á könnunni í hléi. Fyrirlestrarnir hafa m.a. verið um fornminjar, mat, sjóskrímsli, tónlist, trébáta, síldina og stöðu íslenskrar strandmenningar. Áheyrendur mismargir á öllum aldri en alltaf hafa umræður verið líflegar og sum andlitin hafa sést á nær öllum kvöldunum.

Síðastir í röð fyrirlesara vetrarins voru þeir Hreinn Ragnarsson, kennari á Laugarvatni og Örlygur Kristfinnsson, forstöðumaður Síldarminjasafnsins á Siglufirði.
Eins og vænta mátti gerðu þeir báðir efni sínu bráðskemmtileg skil og kvöddu gestir Víkina fróðari en áður um áhrif síldar á íslenskan efnahag og undruðust afrek Siglfirðinga sem reist hafa glæsilegasta safn landsins í fámenninu.

Þeir sem misst hafa af fróðleikskornum í sjóminjasafninu s.l. vetur geta hlýtt á þrjá af fyrirlesurum vetrarins og einn til flytja erindi sín á Akureyri sunnudaginn 29. apríl og siglt síðan með eikarbátnum Húna um Eyjafjörð.




www.vitafelagid.com